తెలుగు భాషకు రాబోతున్న ముప్పు ?

మనదేశంలో హిందీ తర్వాత ఎక్కువమంది మాట్లాడే భాష తెలుగు. దేశంలోని ఏ ప్రాంతానికి వెళ్ళినా తెలుగు మాట్లాడేవారు తారసపడతారు . తెలుగు మాతృభాషగా లేనివాళ్ళు  కూడా తెలుగును నేర్చుకుని మరీ మాట్లాడుతున్నారు . చెన్నై, బెంగళూరు లలో అయితే దాదాపు 40-50% మందికి తెలుగు మాట్లాడ్డం వచ్చు.  తెలంగాణా రాష్ట్ర విభజన జరిగినప్పుడు దేశంలో హిందీ తర్వాత తెలుగుకే రెండు రాష్ట్రాలు ఉన్నాయని, ఇక ఈ భాషకు తిరుగులేదని , పోటాపోటీగా రెండు రాష్ట్రాలూ తెలుగు భాషను ప్రోత్సహిస్తాయని అనుకున్న చాలామందిలో నేనూ  ఉన్నాను . . అయితే ప్రస్తుతం తెలుగుకు పడుతున్న దుస్థితి చూస్తుంటే భవిష్యత్ లో తెలుగు భాష ఉంటుందా అనే అభిప్రాయం కలుగుతుంది నాకు. ఒకప్పుడు పాథశాల స్థాయిలోనే విద్యార్ధులు కధలు, కవితలు వ్రాసేవారు . వారే కాల క్రమేణా మంచి రచయితలుగా మారే అవకాశం ఉండేది. ఇప్పుడున్న పరిస్థితి చూస్తే భవిష్యత్ లో తెలుగు సినీ పరిశ్రమకు కూడా పాటల రచయితలు దొరకక పోవచ్చేమో .
 ఈ మధ్య తమిళనాడులో తెలుగు మీడియం పాఠశాలలు మూసివేయాలన్న ఆ ప్రభుత్వ నిర్ణయంపై రెండు తెలుగు రాష్ట్రాల్లోనూ పెద్దగా వ్యతిరేకత ఆయా ప్రభుత్వాల నుంచి రాలేదు .కటువుగా చెపుతున్నాననిపించవచ్చు గానీ కనీసం ఇక్కడి ప్రజలలో కూడా తెలుగు భాషపై మమకారం ఉన్నట్లు అనిపించడం లేదు . ఇంగ్లీషు మీడియంలో పిల్లలను చదివించడం తప్పు కాదు . రెండో మాధ్యమంగా సంస్కృతం, హిందీ లాంటి భాషలను ఎంచుకోవడం, ఇంట్లో గానీ స్నేహితులతో గానీ ఎక్కువగా ఇంగ్లీషులోనే మాట్లాడడం , ఇంగ్లీష్, హిందీ చానల్స్ ఎక్కువగా చూడడం ఇవన్నీ తెలుగు పట్ల మనకున్న ఏ అభిప్రాయానికి చిహ్నాలు ?
అయితే ఇక్కడ ప్రజలవైపు నుంచి ఆలోచిస్తే వారు చెప్పే మాట - " తెలుగులో మాట్లాడితే జాబ్స్ రావు, ఏ ఎగ్జామ్స్ కి ప్రిపేర్ అవ్వాలన్నా ఇంగ్లీష్, హిందీ తప్పనిసరి అని " వారు చెప్పేది సరైనదే ! ఈ అలోచన రాకుండా చర్యలు తీసుకోవలసినది ఇక్కడి ప్రభుత్వాలు.  తెలుగును తప్పనిసరి చేయడం , తెలుగు భాష ప్రాధాన్యతగా పరీక్షా పత్రాల ముద్రణ ( ప్రస్తుతం ఏ ప్రభుత్వ పరీక్షలలోనైనా  తెలుగుతో పాటు ఆంగ్లంలో కూడా ప్రశ్నలు ముద్రిస్తున్నారు ) లాంటి చర్యలు తీసుకోవాలి . బాధాకరమైన విషయాలు  ఏమిటంటే మన ఎమ్మెల్యేలు చాలమంది కూడా అసెంబ్లీల్లో ఇంగ్లీషులోనే ప్రసంగాలు చేయడం, పాథశాల/కళాశాల ఉత్సవాల్లో డ్యాన్స్ పోటీలకు ఇచ్చిన ప్రాధాన్యతలో పదోవంతు కనీసం తెలుగు కవితల, కధల పోటీలకూ ఇవ్వకపోవడం.
ఇవన్నీ ఏ విధంగానూ మంచి పరిణామాలు కావు. తెలుగుకు రానున్న ముప్పును గుర్తించి ఇప్పటికైనా మేధావులు, విజ్ఞులు తెలుగు భాష ప్రాముఖ్యత పెంచేలా ప్రభుత్వాలపై ఒత్తిడి పెంచాలి.